القداشين
(شعر شعبي جزائري)
..............................
يا سعد نظمت لك قصيدة
ع لغراب عنهم مقصودة
بعيني شفت الرجلة مفقودة
وغير فيقوا يا القداشين
مرحب مرحب بقواشينا
و كل الناس اللي تقرا لينا
نحكي ع اللي صاير فينا
من ها الناس القداشين
قبل ما نخط كلامي
منظومة من حبر اقلامي
نبداها بقول سلامي
نرسلها لسعد بن قرين
نغسل عينين العماشة
ونحكي عن كل القداشة
نحذرهم من لغراب المشماشة
وهم في الدنيا فسادين
ها الدنيا لينا ما حلاها
لو كان القداش اخطاها
والرجلة فيها ما بهاها
ونعيشوا عيشة سلاطين
دنيا لغريب من كل مكان
فيها لحرير وأغلى كتان
فيها لعسل ولحم الخرفان
واماليها منها محرومين
دنيا لغريب عايش سلطان
فيها مهزوز فوق الريسان
ومول النيف يعاني تعبان
وخيار اماليها مصدومين
دنيا لغريب جاي وغادي
عايش في خيرات بلادي
كتان ومال واخبار تنادي
واماليها منها محرومين
دنيا لغريب عيشة هنية
والقداشة حوله من كل ثنية
يخدموه الصبح والعشية
وجميع اصوالحو مقضيين
قداش يطير مثل الطيارة
يخدم لغريب متعة وازكارة
وسمعتو بين الناس اخسارة
مذلة واوراقو محروقين
محروق على طول سنينو
ايكحل والعمش مالي عينو
والحرب شاعلة بيني وبينو
والقداشة عمرهم كانو منصورين
ناصرنا اعليهم ربي العالي
نعيشو ونمشو جنب الزوالي
محال عنها تتغير احوالي
ع الرجلة والنيف متربيين
ع الرجلة ولدنا وتربينا
كبرنا وشرفنا ماضينا
والقداشة ايعسوا فينا
إذا تسول علينا معروفين
سول سقصي علينا وسل
رجال وما نبغوش الذل
كبير صغير فحلة وفحل
تبعنا النبي وطريق الوالدين
الحمد لله ديما لباس
عشنا مرفوعين الراس
والصلاة على خير الناس
والحمد لله رب العالمين
..............................
محمد جعيجع من الجزائر - 01 آفريل 2026م
ليست هناك تعليقات:
إرسال تعليق