قصيدتى رياح العنِد
إحنا إللى جبنا الفراق بإيدينا
لما ضعفنا قدام العِند والتحدى
وقاسينا على قلوبنا وعينينا
ومصعبش علينا وردك ولا وردى
احنا اللى زرعناه جنبنا وحوالينا
ولا راعينا قلوبنا وعشرة العُمر
و خلينا الحُساد يفرحوا فينا
ظلمنا نفوسنا كأنها مش نفوسنا
ولا كان على البال حد يفرقنا
واحنا الحُب جمعنا بأحاسيسنا
وكانت العيون بتحلف بإشتياقنا
و ف لحظة عِند دوقنا المُر
لقينا التحدى جالنا من نظره
ورياح العِند وصلتنا لفراقنا
والمشاعر الحلوه بقت مُره
ومبقيناش قادرين نبلع ريقنا
وبقا عمرنا بيجرى مننا ويمر
ظلمنا قلوبنا بالعِند والتحدي
خلينا عيونا تدوب من الدموع
اللى جرحت خدك وخدى
وشجرة حبنا دبلت من الجوع
نسينا أيامنا الحلوة ليه نسينا
نسينا احلامنا وأملنا ليه نسينا
نسينا غرامنا واول ما ابتدينا
ظلمنا أحاسيسنا اللى بتقوينا
حتى طفينا من حياتنا الشموع
وجالنا العِند فى لحظات ضعف
ولا كان على بالنا يبعدنا ويبكينا
وشعلل فينا التحدى فوق الوصف
وعاش جوانا يلهينا ويلعب بينا
ويكتب علينا ويقول حبنا ممنوع
والعند غوانا وضحك كمان علينا
وإحنا خلينا الحب م إيدينا يضيع
د/ حسن الشوان / مصر
ليست هناك تعليقات:
إرسال تعليق