بقلمي انا عقيلة بعبوش بلقاسم 🇩🇿
قالوا ناس أزمان
ويحسراه على ناس أزمان
كلامهم يريح الڨلب وكلّه امعاني
حكمه وكلام ارزين
وكل كلمه عندها ميزان
ما اقراوا ما كتبوا
حكمتهم فالراس يا لي تفهمني
أهل الجود والنيه والكرم ولحسان
ولي قصدهم ما يروح
من عندهم إلّا واخاطره هاني
اتعلموا من قساوة الحياة ولمحان
ومن التجارب نظموا
أقوال وكل كلمة ليها امعاني
كلامهم نمشيوا عليه
مرتب بحكمه وإتقان
الدنيا اصعيبه ما منع
منها لافقير ولا غني
ماتغرك يا غالط
ماديرا فيها لمان
اتبيعك وتشريك
وتلقى روحك فاني
كيما قالوا ناس أزمان
لا تسرح حتى تلجم
وعقد عقده اصحيحه
ولا تتكلم حتى اتخمم
ولا تعود عليك افضيحه
وقالوا ناس أزمان
ربي يحفظكم من الأحباب
أما عدياني باينين
وقالوا ناس أزمان
وجهك اغسله ونقيه
ما تدري واش اتلاقي بيه
وقالوا ناس أزمان
ما يبقى فالواد غير احجاره
وقالوا ناس أزمان
الي حبك حبه وفي
محبته لا تسال عليه
دير قلبك على قلبه
ولي انوى كل الخير يجيه
وقالوا ناس أزمان
ما يعجبك نوار الدفله
فالزرع داير اظلايل
وما يعجبك زين الطفله
حتان أتشوف لفعايل
ليست هناك تعليقات:
إرسال تعليق