زمن الدش
شعر "سعيد حمدى محمد
★★★★★★
كل يوم همك ييجي على بيت جاري
وانا خايف لا يغلط ويفط على داري
لحد الجرح ما دبح الفرح
والفلاح زود مراري
★★★★★
لما بات ليله سهران
يتفرج ويسقف للأحزان
وعياله اهى بصاله
وهو بيزرع جواهم افعاله
بفلم الساحر والشيطان
★★★★★★
علمهم حرت الارض وازاي تتخضر
علمهم ازاي نبني ونعلى ونعمر
وبلاش تزرع جواهم الضياع
وتملا شقوق ارواحهم بالاوجاع
بكره تجنى ودمعك ع الخدود جاري
★★★★★★
ياما بدرت فيك حب العشم..خيب ومطلعشي
وبعتلك مرسال الامل . انقتل مرجعشي
معلهشي . انا مش هسيب تاري
انا هكسر باعك. وأدوقك اوجاعك
ورجعك لاصلك مادام عندى اصراري
★★★★★★
اصلك عايش فى داومة الدش
لما توهك ببحر النفاق والغش
وخاصمت الغيط والبتاو والمش
ورحمة امك لا اكبدك واضمك
واغربل منك العوج والمك
واربطك فى شغول الصاري
★★★★★★
واخدك امرمغك بطين الريف
واسمعك موال بصوت الشواديف
والطشك بنسيم العصاري
واعشيك بطابيخ الكانون
واسقيك شاى الحلزون
على نار الحطب اللي قايده بناري
★★★★★★
احضنك واضمك واهيم
واعصرك زى الغريم
لحد ماتنضح الحنين
لزمن الناس الطيبين
والمغرفه الخشب
عاشقه قحف العصيده من سنين
بقالهم زمان ع الفرن مستنيين
مبادئ تعود
همك يبقى من همي
وفرحى من فرح جاري
★★★★★★
شعر "سعيد حمدى محمد
23/1/2023
ليست هناك تعليقات:
إرسال تعليق