** قْلِيلْ الْخِيرْ **
وطّيتْ لكْ وْطايْ ...... فِيها زْرَعْتْ
وْ مدّيتْ لكْ ذْراعْ ...... ما ذَارَعْتْ
وْ عضِّيتني بالنّابْ ...... كِيفْ شْبَعْتْ
وْضَيَّاتْ شَمْسِي كْسِيتْهُمْ بِاللّيلْ
.
شَهْدِ الْمُلُوكْ تِفاَّحْ فاحْ ... هْدِيتِكْ
جْحَدْتُو عْلَى الْعِينِينْ ... وْوَدِّيتِكْ
مَا كانْ ظَنِّي لَصْلْ فيكْ قْليلْ
**************
.
ڨالُوا للِّي يْشُوفْ التِّبْرْ يَنْسَى رْمَادُو
و َأنا غْسلتِكْ مِ الرّمادْ حْضِيتِكْ
وْ صَالَحتْ بيكْ الدّهْر ْبَعْدْ عْنادُو
رَاضِيتْ عُمْرِي
و ْصَفِّيتْ أَمْرِي
وْطَفِّيتْ جَمْرِي
وْ ڨُلْتْ جَانِي الخِيرْ
لَكنْ قْمَاشِكْ حاكْ فِيهْ سْوادُو
لاَ فادْ فِيهْ الْوٍدّ ....لاَ لَغْسِيلْ
.
مَعْدِنْ رْفِيعْ السُّومْ نَايْ ... حْسِبْتِكٌّْ
غَالِيتْ بِيكْ وْبِالْكْنُوزْ ... مَا بِعْتِِك
فَصّ دِيامُنْتَه بِالذَّهَبْ ... رَصَّعْتِكْ
نَحِّيتْ ذَهْبِي وْ طُحْتْ لِلڨِزْدِير
ما كان ظنّي لَصْلْ فيك قليلْ
ما كان ظنّي لَصلْ فيم قليل ....
زهرة الحو اشي
من •وشمات•
ليست هناك تعليقات:
إرسال تعليق