بطل الحكايه/صموئيل فايق
بطل الحكايه
وٱنا في البدايه
كان عندي رغبه
إني أكون بطل
لقصه أو حدوته
أو زي ما بيقولوا
في الكتب روايه
أو حتى أي حكايه
من أول مارجلي على الأرض دبت
قلت هامشي ومش هابص ورايا
على حسب ماقلوا
إن إللي يبص وراه يضل الطريق
وأنا مفيش حد معايا
مشيت مستعجل
ونسيت أحط نقطة للبدايه
كان نفسي أكبر بسرعه
ومش فارق هاسيب إيه ورايا
دوست على سنين الطفولة
وخت سنين الشباب معايا
ودي كانت أصعب بدايه
كبرت الهموم والمشاكل
والحمل فوق كتافي تقل
بصت حوليا ملقتش الضحكه
سبتها مع الطفوله
أه منه الاستعجال
لالحقت ألعب ولا أتنطط
فرد الشيب سمايا
والغيمه البيضه
ضللت على إللي ورايا
ملحقتش أكون بطل
كل إللي عملته
كتبت قصيدة
وقلت عليها روايه
إسمها بطل الحكايه
كان ليها بدايه ونهايه
والسرد بتاعها
حمل تقيل
وحظ قليل
قاعد معايا
كان نفسي أكون بطل
لكن الحظ مجاش معايا
ليست هناك تعليقات:
إرسال تعليق