فها الكون كوّن روحك بروحك
وبالعز داوي جروحك
لا تظهّر بكاك و لا تظهّر نوحك
كان ظهّرته
بيديك ڨلبك تكون إنت غدرته
وبيديك ڨبرك تكون إنت حفرته
و لا تلوم عل الڨدر من دوحك
وڨدّاش من حبيب إنت نصرته
و اليوم ما لڨيت حد فسوحك
شي ما يهمّك
ولا تعوم في ڨياس بحر يغمّك
و أترك النّاس غير بوك و أمّك
من صغرك همّا السعوا ضد طيوحك
و لا تحط لڨمة تفوت حجمه فمّك
راهو الطّمع يزيدلك في شيوحك
ڨيس لباسك
و ثوب العز يكون ڨد ڨياسك
بيه تشمخ و يزيان بيه احساسك
يعلّي مقامك و يزيدلك فطموحك
تكرم اصلك و تعرف متانة ساسك
و تفخر بهمّة ارياحهم فلڨوحك
إكتم و خبّي
و في كنين دواخلك اخزن و عبّي
إشبح بعينك و خلّيها على ربّي
وإبلع سكّينهم بوجه ڨفى يتضوحك
ملزوم يجيك وڨت في ڨولك تلبّي
يهابوا ڨدرك عارفين زيت نضوحك
إكمي خبرك
و ڨيس كلام النّاس بحلّة شبرك
و لا تصاحب ڨوم ماهم من سبرك
وخلّيك شامخ بأعلى صروحك
و كل فعل ملزوم ينفعك في كبرك
و زرع الصابة تحصده بعز ڨموحك
لا تصيبك غلبة
و لا تهاب في الدنيا حاجة صلبة
بطموحك راهي تلين مثيل العنبة
ويسهال كل من جا ضد ريوحك
و كل من تحاذيه و تاڨف جنبه
ملزوم يڨدرك و يهاب كسوحك
بقلم حاتم بن حورية
في 2024/6/11
ليست هناك تعليقات:
إرسال تعليق