مَسْرَب حنين/ باللّغة المحكيّة
وَيْن الأهل
واحباب القلب ..وينن؟
مبارح كانوا نبض هالدّار
الجَمْعة الحلوة
الحبّ الدّفا الألفة
وسيرة الأخيار
بمواكب القدر رحلوا
إمّي وبيّي
وجدودنا الكباااااااااار
فِضْيِتْ من ناسها الدّني
ما بقي إلّا مَسْرب حنين
ذكريات معتّقة أخبار
وصور بالأبيض والأسود
شاختْ ع الحيطان
كانت نبضاتهن مفتاح الأمل
واحضانهن بليالي البرد
موقد نار
كان وجودهن عزّ
بركة الإيّام
والخير مدرار
بعدها بالبال محطّات الفرح
تغمز ستّي ع جدّي
تِأْزَع بشواربو البيض
وسروالو الختيار
نفقع من الضّحك
نفهم شو مخبّي موّالها من أسرار
يردعنا صوت بيِّي
متل صاروخ طالع من العِلِّيّة
عيب يا اولاد القهقهة بوجه الكبار
نخبّي الضّحك بكفوف الولدني
ونظراتنا تفقس نجمات الفرح
شيطنة
انطفت يا ناس قناديل الزّمن
واختفى عن ديارنا صوت الكنار
جميلة مزرعاني
لبنان الجنوب
ريحانة العرب/١٥/٧/٢٠٢٦
ليست هناك تعليقات:
إرسال تعليق