( أدفى مكان )
أصغر مكان ممكن يساع أكبر مشاعر
حضن دافي بجد مع لمسة حنان
لو فيه وقت حاوطِتَك كل المخاطر
بتحس دايماً وإنت جوّاه بالأمان
بتروحلُه وإنت للحنان ملهوف
لا بتبقى خايف أو في يوم مكسوف
بتروحلُه لمّا تكون حاسس بالخوف
بالنسبة ليك بيكون ده أدفى مكان
حضن دافي بجد مع لمسة حنان
أوقات كتير بنبقى فعلاً محتاجين
مكان نحاول نلقى فيه بجد روحنا
فيه ناس كتير بيكونوا منّا قُريبين
لٓكنّهم ماطّيبوش في يوم جراحنا
بنشوف أكيد أدفى مكان ونروح عليه
الحضن اللي بننسى كل تعبنا فيه
لو عِشنا يعني سنين عشان نعرف مكانه
أو ندفع العمر عشان بس نلاقيه
الحضن فيه اللحظة بتكون ألف عمر
وتحس إن الوقت فيه تملّي واقف
مهما يعدّي عليك أكيد ويمُر
لا بتقى سامع حد أو يوم شايف
بيبقى دنيا أكيد وعالم تاني
إنشالله حتى إن عشت فيه لثواني
وإن غِبت عنه ولّا مرة فارقتُه
هتحس بعده إنك باقيت وحداني
بقلمي عبدالحميد وهبه
ليست هناك تعليقات:
إرسال تعليق