.......رص الملامح عالرصيف.......
اوعى حلمك
ينكسر جواك
تموت
روحك فيقتلها
السكوت
غنى مهما
الحزن كان
المهم انك تحس
فى عز وجعك
بالامان
لم روحك
جوا منك م الشتات
كمل الصوره
اللى ناقصه
م اللى فات
عيييييش حياتك
حتى لو مفضلش منك
غير فتات
هات ملامحك
رصها قوم عالرصيف
عبى حزنك
وسط اوراق الخريف
كمل المشوار
وعدى
بكره تلقى الصبح
ماددلك ايديه
بكره تلقى الحلم
طالع من عينيه
بكره تلقى الفجر
شايلك امانى
بكره تلقى
الضحك
اصبح ليه معانى
بكره روحك
تنصلب جواك
تقوم
تلقى قلبك دق
من تحت
الهدوم
بكره تلقى الروح
بتصفى من الغيوم
مهما كان السجن
عالى بالف سور
ياما سجن
اتهد
لما اتمد نور
خلى حلمك
ليك جناح
وافرده غطى البراح
مهما كان فيك
من جراح
ضحكتك هى السلاح
وسط ليل
مليان كلاب
تنهشك ساعة الحساب
فاوعى حلمك ينكسر
فتعيش عذاب
كمل المشوار
وعافر
دا الوجع وبجد
كافر ........................
اشرف الشناوى
شاعر عاميه
المنصوره
البرامون
ليست هناك تعليقات:
إرسال تعليق