مُصَلِّحُ المِذيَاعِ :
ـــــــــــــــــــــــــــــــ
شعر شعبي جزائري
ـــــــــــــــــــــــــــــــ
. . . . . 01 . . . . .
يَا بِنْ سِيدِي يَا مُصَلِّحَ المِذْيَاعْ
عَمِّي اسْلِيمُو مُولْ الحِرْفَه
جِيتَكْ وُانْتَ صانِعْ مُشَاعْ
هَذَا كَلِيمِي مَا نْطَقْ بِنْتِ الشَّفَّه
غَيَّبْ لِي لَخْبَارْ وَدَّرْ لِي لَسْمَاعْ
. . . . . 02 . . . . .
يَا بِنْ سِيدِي يَا مُصَلِّحَ المِذْيَاعْ
هَذَا رْفِيڨِي عَنْدِي أَغْلَا تُحْفَه
امْرَافِڨْنِي بِالخُطْوَه وُدِيمَا تَبَّاعْ
لَمْسَه مِنْ اِيْدِيكْ وُمِنْ عَيْنِيكْ شَوْفَه
لَا شَافُو غَيْرَكْ وُلَا لِمْسُوهْ أَصْبَاعْ
. . . . . 03 . . . . .
يَا بِنْ سِيدِي يَا مُصَلِّحَ المِذْيَاعْ
رَكَّبْلُو حَجْرَاتْ وُامْعَاهَا دَفَّه
سَوْدِيلُو لِخْيُوطْ بَدَّلُّو لَشْمَاعْ
رَيڨَلُّو لَمْوَاجْ بِتَدْوِيرْ اللَّفَّه
نَسْمِعْ لَخْبَارْ وُالشَّيْ الِّي يَنْذَاعْ
. . . . . 04 . . . . .
يَا بِنْ سِيدِي يَا مُصَلِّحَ المِذْيَاعْ
انْتَ مُلَا خَيْرْ ادْرَاهْمَكْ سُلْفَه
اَنَايَا أَمِينْ مَا نِيشِي طَمَّاعْ
ايْجُوكْ وُالشْهَرْ ايْدِيرْ لَفَّه
كَلْمْتِي انْتِيجْتِي بَارُودْ وُلَمَّاعْ
. . . . . 05 . . . . .
يَا بِنْ سِيدِي يَا مُصَلِّحَ المِذْيَاعْ
أَنَا ارْفِيڨِي بَيْنِي وُبَيْنُو وَلْفَه
وَاللهْ مَا انْفَرَّطْ فِيهْ وُلَا يِنْبَاعْ
مَلْفُوفْ بِمَنْدِيلْ مَحْمُولْ بِسَعْفَه
امْعَايَا مَوجُودْ نِحْمِيهْ مِ الضَّيَاعْ
ـــــــــــــــــــــــــــــــ
محمد جعيجع من الجزائر ـ 03 نوفمبر 2024م
ليست هناك تعليقات:
إرسال تعليق