قصيدة/ مراكبي
شعر/سعيد حمدي محمد
★★★★★
طول ما فيكي شباب متعافي
اياكي يا بلادي يوم تخافي
من اي طوفان يجيلك
دانا فارس نيلك.
قبل ما تنادي أجيلك
وان غدر الموج
يشقه سيف مجدافي
★★★★★
أنا أصلي مراكبي
عشقك في قلبي
كعشق القلع للصاري
متعلق دايما في شغولة
وهواكي ينام في طولة
زي الموال يصاحب ارغوله
في ليل الصفا ويسافر
★★★★★
وبقالي سنين بعافر
غليوني مايوم يتاخر
طول ما بغربل نهرك
لاجل ما احوش مهرك
واشبك هلب غرامي
فى شط عنيكي واتمدد
وأشدد..فى حبال شبكي الذرد
حالف عمره مايتفرد
خايف تهرب منه الشهامه
وغزل اﻷصالة يتقرض
★★★★★
أنا ماسك الدفه هنا يابا
ومالي قلوعي بنسيم الطيابة
ريس في سفينة نوح
وهالملم معايا الغلابه
★★★★★
دايما عاشقين المهابره في ربوعك
والعرق. بيولد جبابره ف طوعك
حالفين ما ينحنى ضهرك لطوفان
ولا تنزل ع الخد يوم دموعك
★★★★★
شعر "سعيد حمدى محمد
10/1/2023
ليست هناك تعليقات:
إرسال تعليق