متسألنيش عن الحاله
و لا تحطي لي إختيارات
أنا عارف لكن أفضل
أكون صامت عن الإجابات
ما كنت معاكي طول عمري
نخيل طارح في أركانك
و كنتي تعيشي من تمري
لكن و لا مره شورتيني
و عشتي بتنكري خيري
كما لو كنت مش موجود
خلعتي جدوري من طيني
قابلتي الحب ليه بجحود
مشيتي طريق من الأشواك
ناديت عودي ما رديتي
دفنتيني كما الأموات
رضيت موتي لأرضيكي
حدفتي الحلم م الشباك
عشان تبقي و ما بقيتي
أنا هعملك إيه دلوقت
لا أنا موسى هشق البحر بعصايتي
و لا يوسف أفسر حلمك العاصي
على الكهنه اللي حواليكي
و لا عيسى و هداويكي
أنا أخري أحبك موت
يا قاطعه في قلبي حبل الصوت
أنا مش رافض أي سؤال
لكن خايف من الإجابات
دا حبك فرق الإخوات
و كان واجب يجمعهم
يا كوره في ملعب البشوات
و جايزه في متش أحلامهم
دموعك غرقت ورقي
و هدت كل برج أفكاري
بضعفي هبخرك و أرقي
و أقول إسمك في أشعاري
منش قادر صحيح أبعد
لكن قربك أكيد جارح
تعالي بجد نتصارح
بدل ما تحطي ألف سؤال
تعالي نشوف خطاوينا
لفين هتحط بين رحال
الشاعر_فهد_الحوتي
ليست هناك تعليقات:
إرسال تعليق