الديك الفصيح
بيكاكي ويصيح
مش خايف من الدبيح
بيطلع لسانه
وبيعلن عن مكانه
واثق من نفسه
ومين يقدر ينافسه
في العشة رقم واحد
نافش ريشه
وعامل جامد
ما هو
ديك البرابر بصحيح
فرحان بمنقاره
ونازل نقر
حل الخراب بداره
وجاب لأهله الفقر
وكان أختياره
قلة رأى
غلطة
ومحتاجة تصحيح
لكن بعد أيه
فات الأوان
الأختيار كان زمان
دالوقتي
ديك البرابر
علينا قادر
منشفها علينا
وخيره شحيح
فارد قلوعه
كل الفراخ
في طوعه
لو يخالفوه يجوعوا
ومين يقدر
يقف في وش الريح
الديك الفصيح
نافش ريشه
اللي يعارضه
يقطع عيشه
وفي لحظات
غضبه وطيشه
يكاكي ويصيح
تتلم الفراخ البدارى
والأمهات العتاقي
في العشة
رايحين جايين
حيارى
واللي يدور يلاقي
إنه الديك الوحيد
اللي باقي
من غير دبيح
هي الدنيا كده
كل عشة
وليها ديك
مالهوش فيها شريك
هو الحاكم بأمره
وكل ما يطول عمره
يحلو بصحيح
أحمد السعيد الفقي مصر
ليست هناك تعليقات:
إرسال تعليق