القصيدة كاملة بقلم الشاعرة زهرة. حواشي

 القصيدة كاملة

يمّا ارڨدي و تهنّي -1-

يمّا ارڨدي و تهنّي

و لا تكثّري التّڨليب تحت لحودك

يتحيّر ترابك و ڨبرك ظلمه

وِ يضرّك الحصحاص وسط عيونك

يمّا ارڨدي بالرّاحه

و لاتكثّري التّخمام ع اللّي وراك

و خلّي بجنبك للاحباب مساحه

نهار اللي يتحتّم يجُو بَحذاك

يمّا ارڨدي عا طولك

نوّار عا ڨبرك كليل و زعتر

صبّت عليه النّو فاح بخورك

بمطر اوسّو ريحتك تتعطّر

يمّا ارڨدي لاباس

عارف عيونك ما تروم نعاس

اللّحد ما يضرّو الڨبر الغارڨ

و الحيّ ما ينسى عزيز مفارڨ

من ظنّ يوم تودّعي و تنسيني

بعد السّنين من الڨلب تنزعيني

وْ لِحجَر بارد ترحلي تخلّيني

لشكون نشكي مواجعي و حنيني ...

*************

.يمّا ارڨدي و اتهنّي -2-

يمّا ارڨدي عا بِكري

خلّي النّجوم السّاهرات يميلو

لا عاد ليكْ اشوار ليها تِسْري

و لا عاد ميعادك يعَسعِس لٍيلو

و تفكّري و لا تنسي

و لا تاخذِك سَهوات لا تتڨسّي

تزغريدتك في يُوم هنايا و عِرسي

و نصيحتك حينْ الشّديد يرسّي

و تفكّري لمّتنا

أََيّام فرحَه في الهنا جَمعتنا

و تفكّري نهارات ما واتِتنا

نِلوي عليك العطف يا حنِينِتنا...

يمّا ارڨدي لاباس

عارفه عيونك ما تطيڨ نعاس

اللّحد ما يهمّو الڨبر الغارڨ

و الحيّ ما ينسى حبيب مفارڨ

من ڨال يوم ترخّي

و كُبّار جاشك للمشومه يطاوع

و خْبر غُلبك في ضلوعي يْغشّي

و عاد تسمحي يتڨصّ ڨلبي قطايع

يا قلبي يا مڨسوم آش يلمّك

ايام الغلا رجعت عليك وْجايع

والعزّ بعد الوالدين وْدايع

العزّ بعد الوالدين ودايع

يمّا ...

زهرة. حواشي

من مجموعة * وشمات *

Voir les statistiques

Couverture de la publication : 164

4أحلام بن حورية, رنيم خالد رجب et 2 autres personnes

4 commentaires

2 partages

J’aime

Commenter

Partager