وطنك
من غير وطنك محال تبني اوطان
ومحال تلڨى وكر فيه سعادة
وبلا وطن محال تكون انسان
اش تنفع الرياس بلاش سيادة
في حضن وطنك تحس بالحنان
وتحس روحك صيد الخنڨ بو ڨلادة
ومن غير وطنك تصبح ذليل مهان
حتى الكلب تقريب فايتك وزيادة
وكم من غريب أوطان في لحزان
فاڨد حضن الوالدة الودادة
ڨداش ليه على الود والتحنان
ليالي دموعو غلفت الوسادة
الوطن هو والوالدة سيان
من غيرهم ماعاد ليك إفادة
اش الي ينفع في الخيول حصان
لا سرج ولا خيال ولا ريادة
نوصيك وطنك حطو في لعيان
وافديه لو بالروح عز شهادة
وكون عزوتو يوم يكثرو العديان
ويوم ألي يكثرو عليه القوادة
كم من وطن تباع من خوان
على المصلحة يبيع حتى اولادا
حليب المهانة راضعو رضعان
من صغرتو مملوك عند أسيادا
باباه وجدو علڨوو النيشان
مكتوب فوڨ جبينهم قوادة
وكون كيف الطير بالجنحان
في الجو حر صعيب ع الصيادة
وخليك كيف النسر والعڨبان
عل العز مربي عيلتو واولادا
وخليك حافظ درسك و فهمان
امك ووطنك بعد الله ليك عبادة...
حنان العلوي 
ليست هناك تعليقات:
إرسال تعليق