***صبُّوا البحَر***
صُبُوا البَحر عْلى حرايقْ روحي
بالك يْطفّي لاهبات جْروحي
صُبّوا البحر بْكلّو
عاللي مْشُوا و ما ولُّوا
سْتنّيتهُم ما طلّوا
عا العينْ غابوا
في الحشاشه ظلّوا ...
صبوا البحر صبّانْ
و اذا نْشح
نادُوا على الوديان
من مجْردة لمليانْ
بِترابها و احجارها
و بهُوشها و اشْجارها
بسْمومها و هْمومها
و حناشْها و زرزُومها
و جِيبوا حشيشْ الغابه
كبّارها و عَرعارها
و الشّيح و القطّابه
بتِرياقها و صبّارها
و نادوا البعيد
و فزّعوا الجِيران
يغُطّوا الجُّرح غطّان
و زيد فزّعوا العراّفه
الطّبه العزامين و الشوّافه
ملّي تبان الشمس
للّي يغيب الضّيْ
و اذا عجَز الطبّ
زيدوا الكيّْ
زهرة الحوّاشي.
من * وشمات * .
ليست هناك تعليقات:
إرسال تعليق