معلقة *** كون رفيقي***
كون رفيڨي
كون زادي و الزوّاد طول طريڨي
كون خمرتي بيها نبلل ريڨي
في يوم شدّ العدوّ عليّ العسّه
.
.كون العدّه
و كون ليّ سلاح عند الشدّه
و كون الصديڨ اللي ما يعرف ردّه
كون الصفا بعد الغيوم و الوكسه
.
.
كون صوابي
كون الحبيب بعد اللي راحوا حبابي
كون الهنا من بعد طول عذابي
و كون فجوتي و النّصر بعد النّكسه
..
كون الزّاد
كون الحجر ال ما يهزّو واد
كون تربتي وكون لارضي سماد
يصيب الرّحيق ..ما بها النحل كي يمصّه
.
.كون افراحي
كون الشفا من علّتي و اجراحي
كون الغنا و العرس بعد اتراحي
نزهى نلمّ الشمل بعد الغصّه
.
كون الوهره
و كون ساعدي اليمين يوم النغره
كون ملجئي في شِدّ حرّ الصحراء
لما العطش اصبح سراب و مسّا
.
.
كون الخضره
لمّا الربيع يتمّ و يعلن هجره
لمّا الخريف و الشيب ياخذ قدره
و يتربعوا يرسّو علي مرسى ...
..كون متاعي
لمّا العدوّ يجرح و يزيد اوجاعي
ڨطّع لحافك لفّ بيه ذراعي
واربط على جرحي و بيدك رصّه
.
.
كون الثار
يوم العدوّ يطلڨ علي النار
دمّ الشهيد على جبينك عار
من تالة من بوزبد حتى لڨفصه
.
.
كون الهمّ
و انزل على العدوان مثل السّم
راهي الكرامة تنفدى بالدم
هكا غيفارا ڨال ... و عاود وصّى.
.
.
كون الشمعه
ضوي على المهموم وامسح دمعه
خفف عليه الحزن و لطف وجعه
وفي ظلمته كون الدليل و البقصه
.
.
كون الصحراء
خيّال فارس ما تصدّو حجره
في مشاف حامي ما تكبّه عثره
و يوم الميعاد صنديد فاهم درسه
.
.
كون معايا
و في غرڨة الڨرات كون غطايا
هذا توجمبر هلّ مثل مرايا
دافي ثلوجه .لا تضيّع فرصه
.
.
لا تستسلم
هذا الجبان لتوّ فينا يحكم
و كل نحن ما نوخّر شبر يڨدم
ناوي على تهجيرنا بالبخسه
.
.
كون الصابة
كون التمر و الزيت كون الغابه
و القمح بيدي بڨشرته اللهابه
و نوار بو ڨرعون وسط الفصّه
.
.
كون النّخله
يا شامخة ما تخاف طول الرّحله
بسواعد صناديد همّه و رجله
و شهدات في عراجين تبڨص بڨصه
.
·
كون الريح
زلزل كهوف القتل و التذبيح
رايات سودا و دم منها يسيح
اجرامهم فات الماغول و نسّى
.
كون الحنّه
خضّب شعور العاشقات ف وطننا
حناء محنيه عليها غنّى
نجم وامام ..ووصّفوها وصفه
.
كون النّوْ
ضمّد جراح الفقر و امحِ السّو
و اروِ عروقي بالرذاذ السّخو
تبرور دافي نغرفه و نمصّه
.
.
.كون فريڨه
مطمور ڨمح الكاف و عراڨيبه
و باجة و سليانة عليها حصيده
كي يشقها التّراس تغمر نصّه
.
.
كون الحكمة
كون الحكيم ال ما تهزّو كلمه
خلّي قرار الحقّ يعلا و يسما
ولا تخلي للحقاد حتى فرصه
.
.
كون السّلم
شيّد قصور الفلسفة و العلم
عرّي الحقايق حقّ : حرف و رقم
الجهل دانا و حبسنا والرهصة .
زهرة الحواشي في 15ديسمبر 2012
من ديوان رأسي في قفص الإتهام .
ليست هناك تعليقات:
إرسال تعليق