دنيا تمشي بالخلاف
دنيا تمشي بالخلاف
و أنت كي عود الصفصاف
عرقك في فم الحلوف
تكلم كان تحب كفوف
أنت شاقي هو يشوف
معبيها لبن و مسفوف
دنيا تمشي بالخلاف
و ساعتنا قربت بالزاف
خبزة مرة يا لخوان
فيبالك زاهي و فرحان
تسعى و تعدل لوزان
تمشي في كرش الجيعان
أنت تكلت هو يبان
و يردّ عليك البيبان
دنيا تمشي باللخلاف
رشوة و تحيّل و كتاف
خبزة مرة و زادو عليها
الصبابة و كمشة مالجيهة
شدو الصحفة بلي بيها
لحسو حتى في حواشيها
قطرة عرق و طمعو فيها
حطو الراس اتكو عليها
دنيا تمشي بالخلاف
يعيش البلعوط السفساف
عدي عدي يا دوارة
و اكتب يا كاتب و اصغالا
الميزان و نارا و اغلالا
وين هارب سيد الرجالا
كان تدري ترجع في حالة
راني نحاجي باللقوالة
دنيا تمشي بالخلاف
خسارة حاصل في المنداف
ربي أنت داري بحالي
متكتّف منهو يصغالي
كان أنت ربي في بالي
حسبي ربّي فلي جرالي
متعدي نوامي و نشالي
طيّب سموني بوهالي
دنيا تمشي بالخلاف
يا ربي عدل لوصاف
صوّر يا مصور صورة
كي تلقا الظالم في الدورة
راكب وحدا عالصنورة
زيدا و مررلا الكورة
خلطلا شويا دردورة
عطيه يشرب تبدأ الفزورة
دنيا تمشي بالخلاف
نحي الخردة عالنشاف
اصبر يا كبدي ش مازال
مدة و يتعدل البال
شعري في كفي معقال
و صابح ضايق بيا الحال
البس ظلمك كي خلخال
و ذنبك هزا كي لجبال
دنيا تمشي بالخلاف
لخبزة ردوها كرناف
الهاشمي البلعزي
في
2023/12/03
ليست هناك تعليقات:
إرسال تعليق