زجلية تحت عنوان :
*** خْواتْ لْحُومة
خْواتْ لْحُومة...
ؤُ طَاحْ الضِيمْ وَ ظْلام
لَبْلادْ على وْلاَدْها مَهْمومة
فاضتْ دْمُوعْها ...
ؤُ زادْهَا الْهَمْ غَمًة وَسْقام
كْبَرْ التِيهْ واللُومَة
اَشْ نْكَُول ليك يَ بُويا
طْيورْ الحُرًة هَاجْرَاتْ رْسَام
ؤُ مَ بْقاتْ غِير البُومة
طْفاتْ الشموع ، ؤُ تْقاضَى لَكْلاَم
خْواتْ الحُومة
ؤُ سْباب خْلاها نْتَ وُِنْتَ وَ نْتوما
تجار الخطفة وَ كْرُوشْ لَحْرام
فيَا بْلادي اش هاذْ لَغْبِينة
طيورك داسها بُوطْ لَقْزام
ؤ ب لََحْمُوم سَوًكو لْجَايًة ...
زادْ الرْعَدْ ؤُ تْلَبًدْ لَغْمام
بًاكْ صَاحْبي و الحُكَرة ..
لفقير م لْقَى مَ يْدِير بالمرة
ضاقتْ ذيك النفس الحرة ...
والميزان فِ الظلم عام
ؤ لحومة، ما تزهر ؤُ تَعْمَر...
إلا لَرَجْعُو ولادها لذاك لَحْجرْ
رَابو الفياشة صْحاب لَْمَرْقة وَطْعام
رْبيع بلادي حرقوه الحسرافة
هَرْسو لأقلام ؤ رَيْبُو لمدرسة
ؤُ من كل الجهات هْرَب لَحْمام
خوات لْحومة
ؤ طاح الضيم ؤ ظلام
لبلاد على ولادها مهمومة
فاضت دموعها ...
ؤ زادها الهَمْ غَمًة وسْقام
***المغرب***الشاعر والزجال : أحمد الكندودي***
ليست هناك تعليقات:
إرسال تعليق