............. بطل للنهايه ...........
اخصمي
من وجعي حبه
غربلي كل المحبه
ازرعيها في اي حته
حزني فايض عالشطوط
جرحي زي العنكبوت
يرمي خيطه عالفريسه
لما يخنقها تموت
اخصمي
من وجعي حبه
وابدري بيه الغيطان
واكسري الحلم اللي عدي
واخلعي كل البيبان
واخطفي الصبح اللي طالع
واشنقي الفجر اللي بان
لو لمحتي النور معدي
هدي فوق راسه الحيطان
قلبي داق فيكي المشقه
دوقيه حبه الحنان
اخصمي
من وجعي حبه
سيبي قلبي في يوم يعيش
قلبي دايب م الاماني
ينام ويحلم مايلاقيش
يصحى يلقى الدنيا ضلمه
والامل في ايدين شاويش
اخصمي من وجعي حبه
نزلي يالا الافيش
النهايه في اي حته
البطل لازم يعيش
........................ .......
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق