زجلية تحت عنوان:
انا الشعب***
أنا الشعب
لي قهروه السراقة
أنا لي عيشتو شقا ومرارة
تْقب جيوبنا لغلا والشفارة
ؤ باش قستي عزتو ثار وغضب
خوتك اللصوص م لقاو حكام
غاثوا في السيبة والسحت ولحرام
والضبع فيهم عاد سبع ؤ بمالو غلب
انا الشعب
اسمع يا هذاك ويا ذاك لعجب
ماضيك كلو شفرة باين ؤ واضح
خارج تبلبل زعما نظيف مكافح
غدا تْهان ؤيسكت ليك القلب
تبكي لا من يسمع صراخك
وخا تغنيتي خواف م تفوت بابك
حاول إلى ما صدقتي ؤ جرب
تالله حتى تندم ؤ تندب
أنا الشعب
لي كستيه بالفقر والخردة والقهرة
جوعتيه ؤزدتيه ضر ؤ حقرة
كركوز وخروف جرب
بحالك بحال لي سبقوك
ما خترناك غ ضبوعة لي حطوك
خاصكم بجوج القنب ؤ المقلب
ما تستاهلو منا غير الاهانة
فساد وسراق الحق والأمانة
ؤلي على جهل لحسرافة ركب
انا الشعب
أرضي عامرة زراوط طوب وحجر
ففين مني نهار يجي حسابك تهرب
واش عرفتي شكون أنا يا الشناق
انا لي لَقْشاوش تسلطوا عليه ؤضاق
ؤجيبو خوا ؤ تتقب
مالك بلبال عينيك خارجين
لو كان الميزان عادل لكنت سجين
ؤ يْزَرْبُو عليك بالشوك وَ شْطَب
ما شي خوتك، حنا من فصيلة الأحرار
لي جدادهم كافحوا ضد الخونة والاستعمار
ؤ تجي انت يا رتيلة تهيمن وتنهب
ياك نت باقي غير شفار
ب الستيلو حسابك ؤشحال طيرتي من أصفار
حل ودنيك باقي تسمع ؤ تشوف لعجب
بغيتي تسكتنا بالتشكيك واللهاية
حنا ولاد المغرب فشكون نتايا
فانبح يا النباح ؤ في لوسخ تشقلب
هذا هو شانك وتبا عليك وألف تب
دابا يلحوك و يطيح علامك
يغربلوك كِ نخالة ؤتفقد مقامك
و بالحجر يرجموك فتسنى وترقب
انا الشعب
*** الزجال والشاعر: أحمد الكندودي *** المغرب ***
ليست هناك تعليقات:
إرسال تعليق