.......لمرايا .......
غمّضت عيني وحلّيتها لڨيت عمري اتعدّى
و خذاتني ليّام بين الرّخاء و الشدّه
لا دام فيها قياسها و لا زينها و لباسها
لبارح نحلم نكون عروس اليوم هاني جدّه
غمّضت عيني على حلم صبايا
و بسمتي مرسومة على المرايا
و العرسان صفوف طالبين رضايا
مهري قناطير ذهب و السكن سرايا
صوت الڨصب و زغاريد و الغَنّايَا
و الشعر مسدول الكفوف للحنّايا
جرت بيّا ليّام جري فلكْ
و تعدّى العمر بين اليقين الشكْ
و خلّيت كل شيء ورايا
فك الزمان ما فك
لكن ما قدر يفك من ايدي لمرايا
عبدالله جدّي
ليست هناك تعليقات:
إرسال تعليق