حلم واتدفن
يا دنيا يا مدرسه
علمتي كتير فينا
زرعتي فينا الشوك
وحريرك مش لينا
تجرحي قلوبنا بزمه
علشان تربينا
مشوار الألف ميل
قدمنا فيه حطينا
اتبخرت احلامنا
ولا خطوه خطينا
شوك الجناين طرح
اخضرت امانينا
فكرناه زرع وطرح
في جيوبنا عبينا
وقف الشوك في الحلق
جرح اللسان والقلب
موت الحلو اللي فينا
يا دنيا يا معلمه
بطلي تجريح فينا
بقينا جذوع خاويه
وبيوت بقت هاويه
غربانك عششت فيها
شب الحريق في القلب
ومين يطفيها
على جدرنها اترسم
قلوبنا المكسوره
وحلم مات واتدفن
مابقاش فاضل منه
غير حبة غبار وعفن
وكلمة حق جوه الحلق
محشوره
والضهر يوم ما اتفرد
م الحمل مال واتقسم
بقينا حبة رماد
يادوب لونوا الصوره
كلماتي / هاني غريب
ليست هناك تعليقات:
إرسال تعليق