بلا جايحة كل حد لاهي ف روحه
جت جايحة خلت قلوب مجروحه
يا جايحه جيتك ب ربي عفي
هزي حمولك ارحلي وخفي
بلا بيك علينا الزمان متشفي
من ناس هدت للوطن سروحه
من وين نتلفت نصفق كفي
علي ضحى ع الوطن بروحه
ضحى بشرف وامانه
سلم في امه الوالدة الحنانه
وخلى صغاره بامهم حزانه
لاجل الوطن دمه عليها يصفي
رفعوا علمها الفوق علوا شانه
فراسين ما تغبى على المتخفي
جت مذيبه طماعه
خلت سافيها عل عاليها قاعه
من ظلمهم باتت الناس جواعه
وتاكل اللقمة وبالحلال تكفي
ترضى تلبس جرد فيه رقاعه
ولا تلبس حرير الذل بيه تهفي
يجي يوم يا وطني كيف هالساعه
تنفض غبار الوكس الداوي جروحه
تداوي القلوب البايته ملتاعه
من عكس وقت دنيته مفضوحه
- مبروكة بنمنا -
ليست هناك تعليقات:
إرسال تعليق