لسه بفتكر .. شعر / رضا الحسيني
لسه بفتكر ..
لما كان بيضمنا أُنس السَّهر
والضحكه اللي ف عينيكي تاخدنا للقمر
تحكلنا يعني إيه الحب من الصِّغر
وتفهمينا لوزعلنا يدوب بالنظر
أمنا أوأختنا الكبيرة بترتيب القدر
لسه بفتكر ..
ألف حاجه جوه مني بتندهك ف السكات
بتشدني لضحكتك ف الزمن اللي فات
كنت أشوفك جبل يحمينا من حاجات وحاجات
النهارده وانتي ساكته احنا قصادك ذكريات
نضحك نفكَّرِك بكتير من الحكايات
تضحكي وتسكتي ودموعك تترسم ضحكات
لسه بفتكر ..
واندهك بالروح والعيون واللسان
أحكي لايديكي اللي باقي من كلامك زمان
اسمعيني .. ياما سمعتك .. بيندهك فيا المكان
كلنا بننتظر تخرجي تسقينا من تاني الحنان
الدنيا وانتي ساكته ليالي من غير أمان
ليست هناك تعليقات:
إرسال تعليق