وضع مو معقول
.........................................
أحمد ومجد أطفال
كل واحد سب التاني
ضربو بعضن باختصار
ماعرفنا مين الجاني
أحمد قال مجد فجعان
خطف مني الرمانه
ومجد قال أحمد كذاب
هوه يلي طعماني
................
أم أحمد حمشت لإبنا
ومتل اللبوة الغضبانه
هجمت على مجد وقالتلو
آه يا إبن الحفيانه
وأم مجد فزعت كمان
ومتل النار الشعلانه
ضربت أحمد وقالتلو
العالم مانا جوعانه
................
وركضت العالم والناس
واجتمعت كل الجيران
حتى يحلوا هالقضيه
ويفكو بين النسوان
مجد اعتذر لأحمد قلو
خلينا نرجع إخوان
ماكان قصدي تزعل مني
حقك عليي ندمان
...................
وأنا بدوري بدي قول
هاد الوضع مو معقول
لما بيختلفو الأطفال
لازم نكبر لعقول
مابدنا نكبر هالهوه
ونوسعها عرض وطول
كل شخص يربي أولادو
ويتصرف ضمن الأصول
.......................................
ملك محمود الأصفر
ليست هناك تعليقات:
إرسال تعليق