عكعك..في بلاد "العكعاك"
و برّه أكّاك...
ظاهر فيها...حالَّة معاك
...........................
عكعك في بلاد السمسار..
و النّبّار
على بعضهم..يمين و يسار
ما فيهمشي ما تختار ..و بٱختصار
باعوا الطرح جهار نهار
و يا تونس شعبك خلّاك
رجالك و نْساك
عاشقين حياة" الميكماك"
...........................
عكعك واتاك "العكعوك"
قالوا شْروك
و..هوما يا تونس باعوك
عمرهم لا كانوا حبوك..و لا صانوك
تسمسيرة و برّة حسبوك
يقولولك في الوجه..معاك
لكن في قفاك
باعوها أرضك و سماك
......................
عكعك في ساحة نُخب
"من هب و دب"
كل حد على "الموجة" رْكب
مرضَى ما فيهمشي طب
و ملّا عْجب
عُملتهم تنبير ..و..سب
تونس حظك ما واتاك
و ربي بْلاك..
بنخبة تْوَدِّي ...للهلاك
.........و عكعك في " بلاد العكعاك"
الشاعر صلاح الخليفي
ليست هناك تعليقات:
إرسال تعليق