مسكين يا شعب مسكين
قدَاش شبعت تزفزيف وريح
قدَاش ضقت مرَار وفقر وتهميش
وقدَاش طحت في حفر وزرازيح
حكموك عشرا سنين وقالو ما حكمناش
ماتو ثمنيا آلاف وما وصلت تلاقيح
كوفيد ومظاهرات وعياط يا كبدي
وسبحة وإذا لزم صلاة تراويح
ويزيدهم عرك وزغاريد واعلام مرفوعا
وواحد لاهي في شويا شطيح
وإذا لزم قرآن في الشارع وترتيل
وتهليل وتكبير وتسبيح
يا وطني نعرفك مزيان وزاهي
وكان شعبك يتكلم بلسان فصيح
سياسا يا صاحبي والشعب جيعان
واحزاب تتعارك وتسمع كان نطيح
نطيح اكباش قرونها مبريَا
شبعنا وعود كاذبا وتصاريح
يخلصو بالاورو وخدودهم منفوخا
وافامهم للمال محلولا تقول تماسيح
والشعب مقسوم بين الحداثا والدين
ولا ثما حداثا ولا دين وكل واحد يصيح
ويني الكراما والثورالمقديَا يا شعب
ويني الحريَا ماهيشي بوس ومديح
الثوره عقليا وتغيير وبلادنا تزها
والكرامة كي يعيش الشعب مليح
******
الشاعر توفيق جباري ابن المحجوبة/ولاية الكاف****
ليست هناك تعليقات:
إرسال تعليق