................. فيها ايه ..........
فيها ايه
من غير زعل نضحك شويه
أو نداري الجرح م الدنيا الغبيه
لو رسمنا الحلم في بحور الوجع
أو نسينا اللي في طريقنا يوم وقع
فيها ايه
لو بدرنا السكه بشوية اماني
أو حاولنا نزوق الليل بالاغاني
أو خطفنا الضحكه
من وسط المعاني
فيها ايه
لو عشنا من غير القلق
أو خرجنا بسرعه من ام النفق
فيها ايه لو خسرنا
في يوم سبق
فيها ايه
لو لقينا ديابه قاطعلنا الطريق
أو لقينا الموج بيحدفنا لغريق
أو لقينا الجرح وبرتبة فريق
فيها ايه
لو طرت من غير الجناح
أو رميت قلبك حسب
مايكون متاح
أو نسيت ترسم ملامحك
قبل ماتسيح في اللي ساح
لو صحيح عاوز تكمل
قوم وسلم عالحياه
خبي جرحك جوا منك
حتى لو هاتموت معاه
فيها ايه لو سيبنا روحنا
يبقى ليها الاختيار
أو نسيبها زي نجمه في المدار
تغسل الاحزان بايدها
م الطريق أو م العفار
المهم نعدي بيها
من محطة الانتظار
..............................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق