( سلف ودين )
سقّف جامد يعني بقوة
للي في يوم علّمك القسوة
حاول يعني تقرّب منه
وأديلُه كف كبير على سهوة
وإفضل واقف كده قدُامُه
علشان يعرف يعني مقامُه
وإن بجد اللي إنت عملتُه
كان يعني نتيجه لعلامُه
وإنه طِلع أستاذ وكبير
في الخِسة وسوء التقدير
وإن بسبب القسوة بتاعته
مابقاش يعني مكان لضمير
وأمّا يزيد جواه الغِل
وشعوره بالذنب يقل
الإحساس اللي أكيد حاسُّه
أمر طبيعي لِرد الفعل
خلّيه ياخد م الأيام
درس جديد ينفعُه قدّام
ده الإنسان مننا بيموت
ناقصُه الفهم وناقصُه علام
وإن الواحد مهما إن كان
عمره ماييجي على الغلبان
وإن الأيام سلف ودين
داين فيها لابد تُدان
بقلمي عبدالحميد وهبه
ليست هناك تعليقات:
إرسال تعليق