أنا مش قد
أكسر خاطر أي حد.
أهين الطّيب والمسكين
أسرق فرحة ...أطفي شمعة وحيله يتهدّ
بدل الطّبطبة يلاقي الصّد.
يرفع للسّماء الكفّين
ودعوة المظلوم لا تُردّ.
أنا مش قد
أجرح قلب أيّ حد.
بنبضه أستهين
أزرع آه... يحصد هم
أغرس سكّين في الوتين
عن وجعه ...الودان أصمّ.
عوده يضعف ولا يشتدّ
وجعه في رقبتي ليوم الدّين
معلوم...الظّلم حرام يعني بجدّ.
أنا مش قد
أبكّي عين أيّ حد.
أطفي لمعتها...تبهت فرحتها
دمعتها تسيل بحور على الخدّ
أمحي ضحكتها...تُهجر مرايتها
أصلي أنا للذّنب ده مش ندّ.
أنا مش قد
أخلف وعد لأيّ حد.
أدير ظهر... أغيب عمر
والباب بجحود أسدّ
خبير في البيع...خبير في الكسر
قلب أخون...عشرة تهون
أتلكّك ...أتحجّج وما صنش الودّ.
ببساطة أنا مع أيّ حدّ
كلمتي عقد... لكسرك وتد... لظهرك سند
في الشّدة...عليّا تأكّد يُعتمد
بروحي ...بنبضي على يدّك أشدّ.
أنا والدّنيا حبايب عالقدّ
يا دوب أتنفّس والخطو بوجع أمدّ.
بكفاية ذنوب...هي حسناتنا ع الإيد تتعدّ.
ما حدّش منّا يعني فيها ح يخلّد.
بقلمي: ريم منصّر
ليست هناك تعليقات:
إرسال تعليق