لاش تغير
نحبك ما لاڨي تفسير
و متفكر برشا مشاوير
تعديتي ضرب البندير
ڨلبي خفڨ بلا إرادة
داير حرفك في لڨلادة
مخبيها تراها الوسادة
نولي دولة للتحربر
ضحكت عرفت كل أخباري
دخلت ڨلبي فيه أسراري
فهمتني و قرت أفكاري
بديت نرفرف كيف الطير
نحبك ما لاڨي تفسير
و متفكر برشا مشاوير
بلار الخد و نوار
عيون تشبه خلجان أبحار
بين جبالك جنة و نار
و أنا حاير كيف ندير
مرات يزيد بيا الحال
نتشعبط بين زوز حبال
يهسهس صوتك كي المرسال
و خيالك يبدا تصاوير
نحبك ما لاڨي تفسير
و متفكر برشا مشاوير
خزرتلي و دارت إشارة
بحار رميت الصنارة
نغني نعزف عالڨيطارة
نشرب و نعاود مالبير
زهفت في منامي كلمات
نحبك كان أنت بالذات
سمعتهم ضحكت و مشات
حلمة كانت لاش تغير
نحبك ما لاڨي تفسير
و متفكر برشا مشاوير
جاريت الشاعر في كلاما
هو واقع انا منامة
هو صورلي لحمامة
عشڨتك ڨال الصحبي شعير
الهاشمي البلعزي
في
2024-03-23
ليست هناك تعليقات:
إرسال تعليق