أنا المعتقل
********
أنا المعتقل خلف الأسوار والبيبان الحديد
أنا المعتقل في زنزانة قلبها ضلمة وجليد
سجاني معندهوش رحمة ولا ذزة إيمان
فاكر إنه بسجني هيخليني عبد من العبيد
أنا المعتقل خلف الأسوار والبيبان الحديد
أنا المعتقل لكني حر وهم المسجونين
محبوسين جوه خوفهم من غضبة الملايين
ودم الشهداء على ايديهم لعنة ليوم الدين
بكره الحساب يجمع الكرب ليهم ولنا العيد
أنا المعتقل خلف الأسوار والبيبان الحديد
أنا المعتقل وكلمتي سيف على رقبتي
عمري ما ابيع الوطن ثابت على عهدي
مهما ياخدوا من عمري ولا من وقتي
قلبي مليان بالنور مليان بالأمل ولو بعيد
أنا المعتقل خلف الأسوار والبيبان الحديد
أنا المعتقل أنا المستقبل لأجيال جايه
أنا الحقيقة يا ولاد مصر الغالية البهيه
ياريت قبل فوات الأوان تفوقوا شويه
تتخلصوا من قيود الذل وطوق العبيد
أنا المعتقل خلف الأسوار والبيبان الحديد
من خلف جدران الصمت بنادي عليكم
اتحركوا خدوا حقكم من الظالم بأيديكم
مبقاش فيه وقت البلد أمانة في أيديكم
ليه ترضوا بالهوان والغربة والتشريد
أنا المعتقل خلف الأسوار والبيبان الحديد
ليه تسيبوا اللصوص تسرق منكم ومننا الحياة
وبدل العيشه الهنيه تعيشوا ونعيش في مر وآه
العدل عشان يسود بده رجال في وجه الطغاه
ميخافوش من الموت ويرجعوا لبلدنا العيد
أنا المعتقل خلف الأسوار والبيبان الحديد
الشاعر السيد حسن عبدربه...
ليست هناك تعليقات:
إرسال تعليق