* ناسْ .... وْ ناسْ *
النَّاسْ ...وسْط النَّاسْ
و النَّاسْ بارْشا انْواعْ
بافْعالْها ... تنْقاسْ
موشْ لغْو عَا لاَسْماعْ
ثمَّه ناسْ ... مْلاحْ
يا سعْدْ منْ يعْرفْهمْ
مثْل الوردْ ...فوََّّاحْ
تتْمنَّى لوْ تقْطفْهمْ
وْ ثمَّه ناسْ ارْياحْ
يا ليتْ ما تعْرفْهمْ
في الوجْهْ زْيونْ سْماحْ
وْ في قْفاكْ يْبانْ قْرفْهم ْ...
ناس في عينِكْ رُوسْ
فِي الأبَّههْ ...رنَّانهْ
مثِّلتْها ... بشْموسْ
وْ هيَ ذْيولْ خَوَّانهْ
وْ ناسْ ... عزَّ النَّاسْ
متِّْواضْعه.. فِي رْزانهْ
في حضْرتكْ ... الْماسْ
وْ فيِ غِيبْتكْ صوَّانهْ
ناسْ بابكْ ... حْذا بابْهمْ
سيسَانْكم تِتْوالفْ
وْ كيفْ يتْلمُّو احْبابْهمْ
يْقولُو عْليكْ مْعارفْ
إذَا احْتاجُوكْ يتْفكّرُو
يْقولوُ ... فْلانْ يْدبِّرْ
وْ فِي دْلالْهمْ ما يْقصّرو
وْ صبْركْ عْليهمْ تُصْبرْ
وِاذا نْهار ْ...احْتجْتهمْ
وْ فكّرْت تمْنعْ بيهُمْ
لا عادْ يَظْهرْ وجْههمْ
وْ لا بْقيتْ تسْمعْ بيهمْ
ناسْ طَبعْهمْ عَ الهمّهْ
وِينْ ما تْشبّْ تْصيبْهمْ
يتْفكّروكْ في اللَّمَّهْ
وْ نْصيبكْ مْع نْصِيبْهمْ
وْ ناسْ في خْوابيهمْ
في عْسولْهمْ و سْمنْهمْ
و ِاذا دخلتْ عْليهمْ
يْغطُو عْليكْ صْحنْهمْ
ناسْ قلْت ... احْبابي
وْصارحْتهمْ باسْراري
ثيَّقتْهم ... في غْيابي
و أمَّنتْهمْ عا دارِي
عاشرْتْهمْ ... بالنِّيَّه
وْ ساررْتهمْ في عرْضي
صبْحوا .... يذمُّو فياَّ
وْ عايْروني بْمرْضي ...
وْ ناسْ ... وْ ناسْ ... ...وْ ناسْ ...
آه يا ناسْ ...
زهرة. الحواشي
من •وشمات •
ليست هناك تعليقات:
إرسال تعليق