ألماسه لا نصدي لا نبيد
ولا نبدل طبعي وعاداتي
اصلي ما نيشي تقليد
نفخر باشعاري وصيفاتي
تلقى اسمي في كل قصيد
قاموسي منوع وفريد
تعرف باللحن غناياتي
تسمع صوتي في كل نشيد
في العالي ترفرف راياتي
لانطاطي ولا يوم نحيد
ثابت في حسابي وخطواتي
وحتى كان الحظ بعيد
معاند ما يبغاش يواتي
لا يوم يبشر بجديد
والحاضر طامع في الآتي
والدهر مكبش وعنيد
من القهر منزل دمعاتي
لفي يا ليام وزيد
قوي وما يهمكش سكاتي
طوفاني اذا هجم عنيد
تنزلهم لوطى موجاتي
ريحي اذا عصف شديد
وبرقي يلعج في سماواتي
بنت رجال وأصل عتيد
بيهم تتجلى هيلاتي
معاهم كل ايامي عيد
وعز اعيادي بين اخواتي
عليهم قولي والترديد
وعليهم لكلام يواتي
اصحاب همه من سيد لسيد
صناديد لتحمي ساحاتي
وحمى يزهر كيف الصيد
سندة ظهري طول حياتي
ممدوده كفي والايد
نحمد ربي في صلواتي
فاطمة الاحمدي
ليست هناك تعليقات:
إرسال تعليق