أنا إنسان
* * * * * *
أنا إنسان حُر وإنسان
لا بحب قيود ولا اطيق جدران
ما أصل أنا إنسان أيوه أنا إنسان
لا سور وحدود وبحور وسدود تمنع غيه
ما أصل أنا إنسان أيوه انا إنسان
أحب الليل لو حلم جميل أعشق ضيه
وتغور العهود لأمل ممدود طال مجيه
أحب تكون قدام لا تخاف سجان ولسان شتام
والدنيا ورايا وأنا القُدام
والحق سلاحي على البطلان
والحب حليفي على البهتان
والجنة في أرضى في كل مكان
لكل إنسان ما أصل أنا إنسان
أنا إنسان حُر وإنسان
نفسي أوطاني تكون أجمل أوطان
فيها الحرية بلا قيود بلا سجان
بلا حاكم مبسوط بدور الشيطان
ينعم على ده ويجحم ده
لمجرد نزوة حقيرة فيها غرقان
لمجرد شهوة كرسي وسلطان
كله زائل والله كله راحل
وواقف في يوم الموقف العظيم
ما بين أيادي واحد ديان
العدل عنده بالقسط وبالميزان
رب الرئيس ورب الخسيس
ورب الظالم والمظلوم والعدمان
كله في يوم الجمع هياخد حقه
ويا ويلك يا للي فاكرها دايمة
وسايق في الطغيان
ونسيت إنك تكون إنسان
تراعي حق الغلابة
ومتخليهاش غابه
مش فيها غير الديابة
متحولهاش لخرابة
تنعق فيها البوم والغربان
أيوه أنا إنسان حر وإنسان
وهفضل كده لآخر نقطة في دمي
عايش عارف فهمان
إن الحياة لازم تعيشها إنسان
عشان مينفعش أيوه مينفعش
أكون فيها حيوان
أعيش بطباع التعالب والضباع
ويبقى الوطن مشاع
لكل غادر خوان
ينهش في لحم البلد
مش دبيحة هى
متعلقة في دكان
ونبقى كمالة عدد
في مُلك فلان
ولا عزبة أبوكم والأطيان
دى هى الغالية العالية
الباقية من قبل الزمان
أيوه هى الصابرة الطاهرة النقية البهيه
هى بلادنا واللي يستحقها لازم يكون إنسان
لازم يكون إنسان أيوه انا إنسان
الشاعر السيد حسن عبدربه......
ليست هناك تعليقات:
إرسال تعليق