الي امي النائمه
في قبرها
.........نشف الشجر.......
كل حاجه فينا ماتت لما موتى
لسه روحك بين ضلوعي
طايره يامه
وابتسامتك احلى واحلي
الف مره
لسه شوقك زى نور الفجر
طالع جوا مني
لسه صوتك زي ماهو بيلازمني
لسه شايفك في الأماكن كلها
واشتياقي زاد لايدها وحجرها
والغنا من غيرها طعمه بيختلف
حتى قلبي بعد دقه بيرتجف
كل عام وانتي جميله انا باعترف
ان الفراغ بعدك لايمكن يتوصف
نشف الشجر وقع الورق
حتى الأمل سبتيه غيطان
كله اتحرق
والحلم باش والنور ماجاش
والصبح ميت م القلق
حتى الحمام بعد الفراق بطل هديل
والليل قلب بعد الغنا وشه التقيل
فتشد فينا الذكريات فنموت عويل
لسه ايه فينا ماطاله الاشتياق
حتى الحيطان ملت وتعبت
م الفراق
مفضلش غير حبة وجع
من غير زواء
والقلب م الصدمه انكسر
وماعدش فاق
.....................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق