....... يافجر يابو النور.......
هدوا البلد هدوها
موتوا العصافير
اول مايجي الصقر
دي غزه مش أهلها
دي غزه خلق كتير
والكل عاشق لها
لو حتى بالتصاوير
نقعد في ليل الشتا
نحكي ولعيالنا
ازاي وعاش حبها
مافارقش يوم بالنا
حدوته فيها البطل
عيل معاه نبله
حافظ معاني الوطن
والأقصى والقبله
لا مل يوم او سكت
ولا حس بالذله
دي أرض لو مات ضني
بكره تكون حبلي
لا نخل فيها اتحني
ولا بطل الغنوه
الورد يطرح امل
والسكه مبدوره
في عز عز الوجع
الضحكه عالقوره
ياشعب كلك بطل
حتى التاريخ شاهد
كاتب في أول سطر
الستر م الواحد
الارض دي ارضنا
ولحد يوم الدين
احنا اللي كان جدنا
ناصر صلاح الدين
الارض دي ارضنا
غصبن عن الظالمين
بكره هنزرع هنا
الفل والياسمين
والصبح يطلع لنا
من جوا جوا الطين
يافجر يابو النور
ولع قناديلك
واغسل في وش الوطن
وافتح حواويلك
واسقي الغيطان كلها
خليها تدعيلك
الارض نشفت عطش
م الروحه والجايه
يافجر يابو النور
رسي مراكبنا
على بر فيه الأمل
احنا وحبايبنا
يمكن نشوف بعضنا
ونعلي رايتنا
لو ضاع في يوم الوطن
تكتر مصايبنا
يافجر يابو النور
ولع قناديلك
واغسل في وش الوطن
وافتح حواويلك
واسقي الغيطان كلها
هتقوم وتدعيلك.
.............................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق