!!،،أولاد الأصول،،!!
بقلمى : د/علوى القاضى.
... كثيرا مانلتقى ونتعامل مع أفراد مختلفين فى الطباع والأخلاق وفى كثير من المواقف نجد تباينا فى المستوى الفكري والفلسفى فى الحياة
... الكثير منهم تغلب عليهم بشريتهم بكل الصفات السلبية للبشر من الطمع ، والخيانة ، والنفاق و ، و ، و ، اللهم إلا القليل الذين يتمسكون بفطرتهم السليمة فلا تغيرهم الأحداث ولا المواقف ولا المطامع متجردين من الصفات السلبية للبشر هؤلاء مايطلق عليهم أولاد الأصول
... بنعرف إبن الأصول إزاي؟! أنا أقول لك إبن الأصول :
... عمره ما ينكر فضل حد بعد فضل ربنا عليه أو ينساه
... بيفضل باقي على العشرة لحد آخر لحظة وبيعمل كل اللي عليه وزيادة
... وقت الشدة لو احتجته تلاقيه ويمكن من غير ما تطلب كمان تلاقيه قدامك
... بيساعد على قد ما يقدر ومش شرط يكون له مصلحة
... بيعتذر لو غلطان مايستكبرش ، بيقول أنا آسف وغلطت فعلاً وغلطه مابيكررش
... كلمته واحدة ، لما يوعدك تصدقه
... راجل بالفطرة والطيبة ملازماه
... بيعرف يعاتب مرة واتنين وثلاثة لأنه ليس من طبعه إنه يفرط في حد بسهولة ، لكن لما يفرط مايرجع تاني !
... صريح وواضح ولايعرف الحوارات ، يقولك في وشك اللي هو عايزه ، وإيه اللي ينفع ، وإيه اللي ما ينفعش ، اللف والدوران مش طبعه
... لو اتظلم عمره ما يظلم ، يطلب من ربنا يجيب له حقه
... يصفي بسرعة لو كنت شاريه ، وينساك بسرعة لو كنت بايعه
... يحب الخير لغيره حتي لو لم يعود عليه من الخير ده حاجة ، ويفرحلك من قلبه بصدق
... عينه شبعانه عمره ما يبص في رزق غيره ولا يبص في حياة غيره
... لايستغل نقاط الضعاف عندك ولايرقص على جراحك
... يقدر ويحترم أبسط وأقل حاجة حلوة تعملها معاه
... ما يعرفش يخون ولا يجرح ولا يستغل فرصه ولا يستغل حد بصورة سيئة
... صاحب الكل بإخلاص
... ما يعديش عليه واجب ويديلك حقك من غير ما تطلبه
... يديلك إللي انت محتاجه ، ويطلع من جيبه لحد آخر قرش معاه ، ما يفكرش في نفسه وبس ، فى طبعه وأصله الكرم
... مهما كان ناجح أو عنده كتير أخلاقه غالباه ، ما يعرفش يتغر علي خلق الله
... مستحيل يعايرك باللي عمله معاك في يوم ، يسيبك لوحدك تعرف الفرق بينه وبين غيره
... جواه رحمة وعدل ودايماً بيحط نفسه مكان غيره
... مش لازم يكون مشهور ، أو يلبس ماركات ، ولا معاه فلوس ، ولا راكب أفخم عربيات ، ولا ساكن في أرقى الأماكن ، لأنه بيتعامل مع الحاجات دى عادى ، ولا ينبهر بيها لأنه واثق من نفسه ويعلم تماما إن قيمته فى ذاته ، ولا يعرف اللى عايز يعرفه علشان الحاجات دى
... إبن الأصول متواضع لا منصب ولا جاه يغيره
... إبن الأصول اللي بيتعامل بالأصول وليس بالشعارات الجوفاء
... شكراً من كل قلبي لكل ولاد الأصول فى حياتنا
... أحبابى كل سلوكيات أولاد الأصول هى 《خلق المسلم》 الوسطى الحق ، اللهم اجعلنا منهم
ليست هناك تعليقات:
إرسال تعليق