بكره يبقوا يفرحوا
===========
الليل طويل
وانت بتعد الخطاوى
اخرة الرحلة انهيار
وعضمة مايلة
ورجل عوجة
تنعدل لما تجيك فى الحلم
لساها ساكنة ف روحك الهايمة
اللى نسيتك
زى ما نسيت الشياكة
ف هدمتك
الكتف مهدول
و الوش مدهون بالصفار
ايام مرار
رسمت قبل
تلاتين سنة
خطة و حلم
سجلته باسمك ع الهوا
حفرت حمام جوا فيلا
و الشوفير بينحنى
لجل يفتح لك
طريق مسدود
والحلوة اللى لفقرك سبتها
قاعدة جنبك ع البسين
جريت سنين
وانت ماشى بشبشبك
عدمان
و ف سكتك زحاليق
و قسوة البرد
تقرص المرئ
دى اخرتك
كلمتك متقطعة
مخنوقة ف الحنجرة
ما بين فكين
سد الحنك على شكوتك
و لا تفرحش
اللى هيدلقوا قهوة عزاك
و يهربوا
م الريحة
اللى باقية لدنيتك
طارق الصاوى خلف
ليست هناك تعليقات:
إرسال تعليق