.___لميمة___
والله توحشتك لميمة
من بُعدك راو قلبي فد
توحشت الضحكة المزيونة
وتحكيلي حكايات جدد
ما ثمة غيرك يسمعني
قريب و بعيد عليّ بعد
مرة نبكي ومرة نضحك
حتى الضيم عليَّ مسد
جيت نخمم و نوازي
حتى مخي زاد فسد
نخرج اناجي في القمرة
نزل عليّ برشا صرد
نخمم في قسوة الايام و السواد عليّ زاد اشتد
نغمّض نستنى في أحلامي حتى النوم عليَّ شرد
نتلفت نشوف ربيع
نعرف هذا وقت زرد
نمشي نجري و نا ضمآن
تعبت وزاد حيلي تهد
نلقى هذا الكل سراب
صحراء ما فيها جرد
نبات ونصبح في غمة
نتلفت ما عندي عضد
حتى جاني سرب حمام
فرحت قلت سعدي تقد
نعلّف و نشرّب و نغطّي
وما ملّيت من طول الامد
مرت مدة و ايامات
ياخي ظهرو الكل غرد
دعيوة منك يا لحنينة
تتحلي بيبان جدد
تبسيمة وضحكة من عينك تنزاح عليّ لعقد
والله توحشتك لميمة
من بُعدك راو قلبي فد
وليدك راهو موضام
بكثر العلة بلاشي طب
لا عندي تالي و الا والي
وحتى الوقت عليا صعب
من حفرة لحفرة مخرجتش
كيف تتسوى تولي حدب
حتى بدلت الفيتاس
ياخي المارش اريار اركب
باهي قلت يالله ناقف
هاو الحيط ليّ قرب
من الربثة ياخي معرفتش
نكسيلاري بلاش سبب
في رمشت عين سمحت لطخة
و بعد اللطخة
حتى الحيط زاد نقب
نلقى روحي في واد
لا تبنة ولا عود قصب
انت ياسعدي اشبيك
نجي ناقف و انت تكب
منين كان جيبي مليان
و الله الناس عليّ حضب
ولا واحد منهم يغطاض
كيف نلعن و نزيد سب
قلت بها الصبحة نطمان
الكلها ظهرت حزمة حطب
والله توحشتك لميمة
من بعدك راو قلبي فد
بقلمي __ توفيق حجلاوي
2021/12/12
ليست هناك تعليقات:
إرسال تعليق