••• حنين •••
في ڨلبي غصّة
من مدّة تسري بالخاطر
على زين الڨصّة
محبوبي مكحول النّاظر
***
على جبينو بڨصة
مشمومة في صفح مرامر
وغناجي مرايا تشوف فيهم وجهك ما تشاور
***
والرّڨبة مرمر
بالحنّة مرجولة مشاطر
وصدر مفصّل بفصايل ربّاني ظاهر
***
صهوة مكنوزة
مسروجة ڨواطن وحراير
وغثيث مهندل ومهدرڨ يبغيه الخاطر
***
ومعادن حرّة
مرفوعة في مثل مساطر
نڨرّبلو خدّي يطاطي ويذبّلّي شوافر
***********
نشكيلو بهمّي
ونڨلّو جيتك م الغربة
يا زين المحفل
يا عشيري
يا جميل الرّڨبة
يهمس لي وينك ...
يا زين العشرة والصّحبة
***
يا سمح الطّلّة
من هزّك نسّاك أحبابك؟
يا بنيت الدّشرة
نسيتي دوّارك وأترابك!
يا خدّ المهرة
مشيتي وما ردّيتي جوابك ...
***
خلّيتي حبيبك
متكدّر والڨلب يفتّش
مروج الدّهماني
وريحة نواويرو ترشرش
والرّحلة صعيييييبة
كيفاش نشوفك ؟
ما عرفتش
***
نبكو جمليّة
ونتفكّر بابا واللٌمّة
وتخنڨني العبرة
وفي كنيني تلهمني غمّة ....
يحنخن ويمرّغ عاشعري الرّڨبة واللِّمّة
ويحكيلي حكاية
نفهمها ... وما نبوح بكلمة !
***********
نركب ونسلّم أقداري
لخفيف النّدهة
يصهل ... ونزغرط...
ويرفرف عرّوح الوجهة
ويڨلّي هيّا
نزوروها يمينة وشمال
***
لبلاد بلادك
وطنك ... يا زهرة لجبال
ويربّص خطوة
بخلاخل عاج ومرجان
ونهدّو هدّة
تحكيها أجيال ورا اجيال
***
في مشاف مسيّب
لا مسطّر لا مڨيّد نهجَه
والنّسمة تخبّل
تروي عروڨي ...
وتحيي المهجة
و نوّار مصفّف ... يترشّف
عجباتو الفرجة
***
ونعيو ... نرتاحو
تحت الكرمة ... وسط المرجة
حلمة جمييييلة
حلمة حنيييينة
نحلم بيها ...
وفيها نرجى ...
زهرة الحوّاشي
***من ***وشمات
ليست هناك تعليقات:
إرسال تعليق