(من الشعبيات) قصيدة 'نسيت ننسا'
نسيت ننسا
ونسيت نكمل طريقي وحدي
ونسيت نبطل نقسا
ونسيت نكوي بالنار الحامية كبدي
---
نسيت نشّح لقدام
ونمشي في طريقي معدّي
وننسا كل من تبع خطوة لحمام
وخطوته باعده من عندي
ونسيت نخليهم للوهام
ونظمّ قلبي وفمي على الكلام الصندي
ونسيت غدوة يتجلا الغمام
وما يلقوني غير في جناين كدّي
---
ونسيت قداش قلت كلام
الجبل كان سمعه تشوفه يندّي
قداش في الناس قلوب ظلام
لا حاسبه حساب كان للي يجدّي
وقداش من خطوة مشيتها لقدام
بالك ريح الغلط فيهم يهدي...
---
نسيت ننسا
ونسيت نكمل طريقي وحدي
---
واليوم تفرقت لقسام
وكل من غدر الحبّ
وشاف روحه اليوم زمانه وردي
غدوة تعري لأيام
قدامه شوك وجمر مقدي
وغدوة يتفكر كلام
لا من حبه وتمناله الخير قدّي
واليوم هاني نسيت ننسا
ونسيت نكمل طريقي وحدي
---
هي ليام داله بداله
ولا يعجبك حال
كل ساعه مبدلات حواله
والبلاد صغيره
تكشفله حبّ اللي في الطريق غداله
وتخبره بللي ترك كلام الحقّ
ودار في روحه بالجهل والكذب حاله
واني بالنهاية ننسا ونلقا الخير
في كلّ مطراح ننثر وردي
وكنك تذكرتني
خوذي سلامي بكل الحبّ اللي ليك عندي...
---
نسيت ننسا
ونسيت نكمل طريقي وحدي
ونسيت نبطل نقسا
ونسيت نكوي بالنار الحامية كبدي
07/09/2022
المختار المختاري 'الزاراتي'
ليست هناك تعليقات:
إرسال تعليق