الي_نحبو// بلهجتنا..
طلعلي الغاز وسربي
واملا البرميل وعبي
واهوكا الملح مخبي
ماشي بفرنك ودورو
من حينه يقصد ربي
الّي نحبو ونودو...!
..//
يا معلم شد الساعد
كانك عالبر تسير
أحفر وحط الشاهد
وارمي عالقاع سرير
برامل عالبحر تنادي
وقلوب الناس تدادي
كيفاشي تو انردو
الّي نحبو ونودو...!
..//
قالي الهدرة لاباس
ما فما علاش تخمم
عالبرمة والكسكاس
شكشكها تولي معلم
يكفي م اوجاع الراس
خوذ الحكمة و اتعلم
الي قلتو يعمل ضده
الّي نحبو ونودو....!
..//
نعيشوا في غابة كبيرة
وقليل الجهد يموت
حتى الي في التصويرة
حوت الي يأكل حوت
والثعلب ماهو صاحب
لا نخلي الباب موارب
لا نخبي مفاتح عندو
الّي نحبو ونودو ...
...//
خبزتهم طابت واحنا
الفارينة في الحانوت
وجمرهم واقد شحمه
و كانونك في البيوت
تحت الفراش مخبي
وميمونه تعرف ربي
والهارب مين يشدو
الّي نحبو و نودو.....
ليلى_السليطي
ليست هناك تعليقات:
إرسال تعليق