زجلية تحت عنوان
قالوا زمان***
قالوا زمان
لكراب في وقت البرد ..
صاحبو
وبك يكثر ترحابو
لا يكون دينك منان
رد لخير ؤفتح بابو
صحبة لعسل ؤ قامة لبدان
فيها م تيق والسبع بوس ترابو
خطيني من زواق ولوان
بنادم بحال لحرباء م تعرف عيابو
البسمة في وجه خوك عطر ريحان
تدخل قلبو ؤترتاح عصابو
عنداك تعاشر ل كان
ؤ م تكبر فشحال منهم خابو
تبعوا زواق ؤ لبهتان
ؤ ل تديرو حبيب يخرج نيابو
عش بسيط قانع ي فلان
تسعد والقلب تزول أتعابو
حوايج ناس قضيها بامتنان
م تكون بحال ل فضل هْلو و قرابو
ؤ ل عطيتي لعهد صونو بالشان
م تكون في الزور شريك ؤ ل خرابو
***الزجال والشاعر: أحمد الكندودي *** المغرب ***
ليست هناك تعليقات:
إرسال تعليق