برشا نجوم
خوذ نصيحة و تعداها
الكلمة الدونية انساها
خليها دين لمولاها
ادور و ترجعلا و يلقاها
رطّب حرفك و امشي حذاها
الحكمة كي الوردة محلاها
ريدي تعرف لي نهواها
كي الحوتة تسبح في ماها
ريدي كي تبعد نلقاها
كي الطير نرفرف في سماها
و تعدينا
و تعاودت ليّام
و تخدرت عينينا
بالحبّ و الأفراح
ياما دروب مشينا
نسمات و حكايات
كانت تهبّ علينا
مرّة الفرح يسعدنا
و مرة الحزن يكوينا
و تعدينا
يا فرح لا تنسانا
يا سعد لا تخلّينا
بعض المحبّة ادّوم
و بعض الحباب يعدّو
و الدهر يوم بيوم
سحابات ما يتشدّو
لا يهزّك التيّار
لا تعوم وحدك ضدو
حاذي صحاب العقل
و احكم غزالك شدّو
لا تتوه في الوديان
لفنان يبني سدّو
لحباب كان مشو
لا يعاودوا لا يردوا
يا بدر يا مواسيني
يا ورد يا كاويني
نحتار فيك علاش
و انت قبالة عيني
يا حرف يا رُبّان
كي نوجهك تحميني
يا شعر يا سُلطان
في مدينتك خبّيني
يا حبّ يا ميزان
مَيِّل عليّ و ارويني
يا مريم الأوطان
ردّي الفرس و ايجيني
نا شابحك في الحلم
كي النور فوق جبيني
صافي كلامي رزين
ما يبدّلاش اللُّوم
بفكري نردّ الشين
لكمباس نسر يحوم
قلبي عليك حنين
غوّاص كيف نعوم
نراعي شُرُوع الدِين
نرتاح كيف نصوم
الشعر هاهو وين
نكتب قصيد يدوم
و رسمت بالحرفين
مريم و برشا نجوم
الهاشمي البلعزي
في
10/01/2023
ليست هناك تعليقات:
إرسال تعليق