___ غدر زمان ___
ياقلب يا كاتم الاسرار
قداش حامل وجايع
من الضيم الريق مرار
وزادت عليه الفجايع
الوقت و الزمان غدار
ومعاهم البخت ضايع
الفكر والعقل احتار
وجوه بدلت طبايع
من صغرته الجمل هدار
و للغير يحمل ودايع
لاهو خسيس نكار
و لا هو في الطبع مايع
دمعه على الخد مدرار
ماتقول مرضه شايع
يتقلب على الفرش جمار
والليل طوله سوايع
قداش يا ضيم قهار
مع القهر زادت لوايع
يارب شيمتك جبار
ورحمتك معاها شفايع
هبوبك ريح و غبار
جابت ألفاع و ضبايع
منهم لحقت اضرار
حرمت علينا البقايع
ليك أول وآخر قرار
في الضيق والا وسايع
بالطبع ما نخالط أشرار
ولا نقعد مع مرايع
ساكت وحامل أسرار
وماني للخبر شايع
رباية جدود ثوّار
ماني مسلّم و طايع
بكلامي منيش نبار
اسد و قائد الطلايع
__ بقلمي __ توفيق حجلاوي
ليست هناك تعليقات:
إرسال تعليق