بدون عنوان
أنا إللي بدون عنوان وصفتوني
وفوق كتافي بالفراق وحملوني
وكل إللي حوليا إتفقوا عليا
ومن حياتهم بعيد ونفوني
علشان حالي بسيط التمن دفعوني
وفاكرين إن عليهم هايتجن جنوني
إنتو إللي إختارتوا وبعيد وداتوني
هاعيش وحدي ومش هادمع عيوني
وهامسح من حياتي ذكرياتكم
وأنساكم قبل ماتنسوني
وأكتب أساميكم بدون عنوان
زي ماكتبتو إسمي وجرحتوني
وخساره فيكم كلمة عتاب
علشان بتصرفاتكم أهنتوني
وكمان إتخدعت فيكم
وبالوش التاني وهمتوني
مش ندمان علي كلمة حلوه قلتهالكم
ولا السلام إللي من قلبي وبسمة عيوني
إنتو إللي هتخسروا وهاييجي عليكم اليوم
إللي فيه هاتحتاجوني ومش هاتلاقوني
علشان دايماً البادي بيبقي الأظلم
وكمان صورتكم هامسحا من عيوني
وأوعدكم حتي بيني وبين نفسي
مستحيل هاقول وحشتوني
لإنكم يالنسبالي بقيتوا سراب
وقربكم مني أكيد هايعطشني
غلطانين لو فاكرين إنه هايرويني
وأكتب رسايلي بدون عنوان
أحسن ماحدى يعرف مكاني
صموئيل فايق
ليست هناك تعليقات:
إرسال تعليق