( الومه ليه )
اعاتبه علي إيه والومه ليه
وقسوته عليا اعمل فيها إيه
اعاتبه علي ظلمه ليا
ولاَّ ألوم نفسي علي لهفتي عليه
ولاَّ ألوم قلبي علي انشغاله بيه
حبيبي مزعلني ومخاصمني
وكل ما اشتاقله يجرحني ويهجرني
واحن إليه يعذبني ويلومني
ظلمه ليا ماكان علي بالي
وأكدب نفسي واخبي واداري
واعاتب نفسي وأنا كلي حنين
مش قادر انسي حبي ليه طول السنين
ولا قادر أصدق قسوته عليا
ولا قادر انسي حِنيتي عليه
لو خصامنا طال بيني وبينه
ازاي أقدر أعيش من غيره
ونار البُعد كوياني وملوعاني
وليالي الغرام كتير وحشاني
هو يعني عشان بحبه وبهواه
افضل اتحمل ظلمه وجفاه
ولاَّ عشان كان نِفسي اعيش وياه
يسوق عليا دلاله
بعد ماكنت كل احبابه
قوللي يآحبيبي مين غير أحوالك
وايه هو اللي جرالك
انا لسه بحبك وقلبي شاريك
ومشاعري لسه دايبه فيك
ولسه بشتقلك وبحنلك
ووحشاني ليالي حنيتك
فاكر يآحبيبي لماَّ حبايبك كانوا بيغيروا منك
ودايماً بيجيبوا سيرتي وسيرتك
دنا من كتر إخلاصي ليك
رسمت علي نن عيني صورتك
عشان محدش تاني يشغلني عنك
ياحبيبي تعالي ننسي عذاب الليالي
من غير مالومك واعاتبك ع اللي جرالي
وكفايه انين ودموع وآهات
ليه ليالينا الحلوه تبقي يآحبيبي ذكريات
خواطر.. ( أشرف الدغيدي )
حقوق النشر محفوظه
ليست هناك تعليقات:
إرسال تعليق